الاسئلة الشائعة

ايه الفرق بين فرصنا وأي شركة توظيف؟ هل مطلوب مني أدفع رسوم تسجيل؟

فرصنا مش شركة توظيف، فرصنا موقع للوظائف. الشركات اللي عايزة تعين موظفين وعمال بتعلن عن الوظائف من خلاله. احنا بنسهل على الشركة عملية البحث عن موظفين وعلى أي حد بيدور على شغل إنه يبحث عن وظيفة، الشركة هي اللي بتعلن عن الوظيفة، وهي اللي بتختار الموظفين اللي هتعينهم.
أي حد بيدور على شغل يقدر يسجل على فرصنا ويقدم على وظائف والخدمة دي مجانية 100%.

إزاي الموقع بيستفيد رغم إن الخدمة مجانية؟

الشركات والمصانع بيدفعوا مقابل مادي عشان يعلنوا عن الوظائف الخالية على فرصنا لأنهم محتاجين عمال وموظفين كفء. لما أنت بتقدم على الشغل احنا بنوصلهم بياناتك وبيانات بقية المتقدمين على نفس الوظيفة عشان يختاروا منهم ويتواصلوا مع أنسب حد للوظيفة.

ايه الضمان إن الوظائف حقيقية؟

أي حد بيدور على شغل يقدر يسجل على فرصنا ويقدم على وظائف والخدمة دي مجانية 100%.
احنا بنتأكد من مصداقية الشركات بإننا نتأكد من السجل التجاري والبطاقة الضريبية عشان نتأكد من هوية الشركات وإن الوظائف حقيقية فعلا.
مفيش وظائف وهمية لأن الشركات بتدفع مقابل مادي عشان يعلنوا عن الوظائف على فرصنا.

ايه هدف موقع فرصنا؟

هدفنا فى فرصنا إننا نساعد أكبر عدد من الناس اللى بيدوروا على شغل. بنحلم نساعد على توظيف أكتر من مليون شخص من خلال فرصنا.

فى شغل للبنات؟

فرص الشغل متوفرة لأي حد سواء رجال أو سيدات طالما معاه بطاقة الرقم القومي.

فى فرص عمل غير الموجودة على الموقع أو على صفحة فيسبوك؟

موقع فرصنا عليه كل أنواع الوظائف وفي شركات جديدة بتعلن عن وظائف جديدة كل يوم. تابع الموقع كل فترة عشان تشوف الوظائف المتاحة، وكمان ممكن تكلم خدمة العملاء عشان تتابع الوظائف الجديدة المناسبة ليك.

هتتصلوا بي امتى؟

احنا مش بنتصل بالناس اللي سجلوا لكن لو عندك مشكلة في التسجيل كلمنا على 0223225590 أو 19916.
لما بتقدم على وظيفة بياناتك بتتبعت للشركة. لو الشركة ناسبتهم بياناتك بيكلموك على الرقم المتسجل عندنا وبيحددوا معاك مقابلة. لو محدش من الشركة كلمك ممكن الشركة تكون عينت حد تاني أو لقوا بياناتك مش مناسبة للوظيفة. بننصحك تقدم على أكتر من وظيفة عشان تزود من فرصك.

إزاي أعرف الشركة قبلتني ولا لأ؟

1- لما بتقدم على أي وظيفة احنا بنوصل للشركة بياناتك عشان يقدروا يتواصلوا معاك.
2- لو بياناتك ناسبتهم بيكلموك عالتليفون عشان تيجي المقابلة.
3- عشان تعرف حالة طلب التقديم بتاعك، ادخل على الموقع وسجل دخولك وادخل على "لوحة التحكم". 4- في أسفل "لوحة التحكم" بتقدر تشوف حالة طلبات التقديم بتاعتك، وتقدر تعرف إذا تقديمك تمت مشاهدته من الشركة أو لأ.
5- لو بياناتك كانت مناسبة هيتكتب إنك مناسب، ولو مكانتش مناسبة هيتكتب إنك مرفوض.
6- تقدر كمان تعرف حالة التقديم بتاعتك عن طريق الخط الساخن، اتصل بينا على 0223225590 أو 19916.
7- لو الشركة رفضت طلبك ممكن تكلم مسئول توظيف فرصنا على الخط الساخن وتتابع الوظائف الجديدة اللي نزلت وتقدم على اللي يناسبك منها.

فيه شغل خارج مصر؟

حالياً الوظائف المتاحة في مصر بس، لكن أنت ممكن تحدد في بياناتك إنك حابب تشتغل بره مصر ولو في وظيفة اتوفرت هنعرشحهالك على الموقع أو من خلال الخط الساخن. في الوقت الحالي ممكن تقدم على الوظايف المتاحة داخل مصر.

ايه سبب رفضي في الوظيفة؟

أسباب الرفض بتختلف حسب كل شركة واحتياجاتها. ممكن تكون بياناتك مش مناسبة لمتطلبات الوظيفة أو لأن عدد المتقدمين كبير والتنافس كان عالي على الوظيفة فالشركة اختارت متقدمين تانيين.
عشان تزود فرص قبولك في الوظائف:
1. احرص إنك تحدث بياناتك باستمرار.
2. أضف أكثر من رقم تليفون.
3. قدم على أكبر عدد ممكن من الوظائف المناسبة لك.
4. كل فترة ادخل على الموقع أو كلم الخط الساخن عشان تتابع الوظائف الجديدة.

هل أقدر أتواصل مع الشركة أو أحصل على رقم تليفونهم؟

عشان نحافظ على بنود الخصوصية للشركة، موقع فرصنا مش بيوفر معلومات للتواصل مع الشركة. الشركة هتتواصل الشركة معاك بس إذا تم قبولك للوظيفة.

ايه معنى إني موجود على قائمة "المرشحين للتواصل" في الوظيفة؟

الشركة بتضيف بعض المتقدمين لقائمة المرشحين عشان تتواصل مع أنسبهم للوظيفة، وتحدد موعد مقابلة أو تعمل مقابلة عن طريق التليفون.

أنا سجلت وقدمت على وظائف. ليه محدش من الشركة اتصل بي لحد دلوقتي؟

لما بتقدم على وظيفة بياناتك بتتبعت للشركة. لو بياناتك كانت مناسبة للشركة هيكلموك على الرقم المتسجل عندنا ويحددوا معاك مقابلة.
لو محدش من الشركة كلمك فيه أكتر من سبب:
1- التنافس كبير لأن عدد المتقدمين على الوظيفة كتير فممكن الشركة تكون اكتفت بعدد معين من المتقدمين. حاول تقدم على وظائف عليها عدد متقدمين أقل.
2- بياناتك مش مناسبة لمتطلبات الوظيفة. اتأكد إن بياناتك مناسبة من ناحية السن والمؤهل والخبرة.
3- لو الوظيفة منشورة من فترة قصيرة ممكن تكون الشركة لسة ما بدأتش في اختيار المتقدمين.
4- الوظيفة بتفضل مفتوحة في موقع فرصنا لمدة أقصاها شهرين. لو محدش من الشركة تواصل معاك في خلال المدة دي ممكن الوظيفة تكون بقت غير متاحة أو تم تعيين متقدم تاني.
بس أنت ممكن تقدم على أكتر من وظيفة عندنا عشان تزود من فرصك لحد لما تلاقي الوظيفة المناسبة ليك.

أنا مش متأكد إذا كنت هروح المقابلة. ينفع أقدم؟

لو مش مقتنع بالوظيفة أو مش عايز تروح المقابلة يُِفضل ما تقدمش عليها. أولاً لأن دا بيدي انطباع سيء عنك عند الشركة وثانياً ممكن يقلل من فرصتك لما تقدم على وظائف في المستقبل.

فيه وظائف للطلبة؟

فيه شركات بتطلب موظفين ومش بتشترط شهادة المؤهل. ادخل على صفحة بحث الوظائف واختار المجالات التي عايز تشتغل فيها، تحت على الشمال تقدر تعمل "تصفية النتائج حسب المستوى التعليمي" وتختار الحاجات اللي تتناسب مع مستواك التعليمي.

هل ينفع أكلم الخط الساخن وأقدم لحد تاني؟

لو تعرف حد من أصدقاءك أو قرايبك عايز يشتغل خليه يدخل على forasna.com أو خليه يكلمنا على الخط الساخن. ويفضل يكلمنا بنفسه ومسئول التوظيف في فرصنا هيساعده.